CXCVIII.

1346, October 10. Avignon.

Papst Clemens VI. befiehlt dem Abte von Kamenz, Mönche und Laienbrüder des Klosters ohne Rücksicht auf ihre Appellation zu strafen.

Clemens episcopus servus servorum dei dilecto filio . . abbati monasterii in Kamentz Cisterciensis ordinis Wratislaviensis diocesis salutem et apostolicam benedictionem. Exhibita nobis tua petitio continebat, quod nonnulli tui monasterii monachi et conversi, ut tuam correctionem evitent et regularem fugiant disciplinam, frivole appellationis obstaculum sepius interponunt sicque eorum excessibus remanentibus impunitis reliqui assumunt exinde audaciam deliquendi. Cum igitur appellationis remedium non ad diffugium malignantium, sed oppressorum suffragium sit inventum, discretioni tue per apostolica scripta mandamus, quatinus non obstante huiusmodi frivole appellationis obiectu in corrigendis monachorum et conversorum ipsorum excessibus libere tui officii debitum exequaris, contradictores per censuram ecclesiasticam appellatione postposita compescendo. Datum Avinione VI. Idus Octobris pontificatus nostri anno quinto.
Mar. de Testis.
Auf der Rückseite: Symon de Legnitz.

Or. Perg. mit der Bleibulle an einem Bindfaden.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.